na quistion de i tènpi moderni

gai, can e lanpiói

A quei da Lago - fursi anca parché i a poca fantašia - na olta i ghe ciaméa anca "fašói" (da Lago). Ma no l'é che tuti quei da Lago i èpie poca fantašia. I gai, par ešempio, i ghe n'à tanta: i canta de nòt. Un podaràe anca pensar che i é oltadi via co la cresta... ma tuti su na òlta, mò? Nò, i gai da Lago no i é ne fašói ne mati. L'é che 'l so mistier l'é quel de darghe a quei pelandrói de òmi che i dròn al segnal che l'è gnest ciaro. E qua l'é 'l fato. Qua a Lago i te a fat na luminazion che de nòt tu ghe vet fa de di, co i pai cusì fisi che co le machine le sbrisa su l'asfalto injazà le ghe 'n bat do doi al colpo (no tu pol intivar nò de schivarghe 'n un!) E cusìta i gai, co tut sto ciaro, (tu te salva su le prime ore de la sera parché lori, come che se dis, "i va a dormir co le pite") i taca a vèrder l'òcio pena pasà 'l primo colpo de sòn. A le undeše presapoc. E lora salvarse! E par no èser da manco i can (cosa pòsitu dirghe? anca lori i fa 'l so mistier co i sènt qualcosa che no va!) i taca a baiar. E lora no resta altro che vèrder la fenèstra e vardar la luminazion (parché pai ghe n’é‚ restà tanti asèi anca se i li à s-ciaridi a far la sglisola co le machine che un na nòt, sul terzo fracas l'é gnest su la fenestra e l'à dit squaši fa 'n somo pontefice: "Correte, fratelli!" e 'l te à tirà do 'n can che a tašest de paca no sol i can ma anca i gai.