te i ani setanta

la corsa de i mus

(che i ghe ciaméa anca “Scarpedante”)

N’antra roba che ghe fa lustro a quei da Lago (e de Santa Maria, Caiada e Socroda) l’è sènpro stat la corsa de i mus. Na roba infin “original”, se no fušese che la solita malalengua la podaràe ancora dir che da “fašói” a “mus” la diferenza la è poca. Ma noi no ghe ‘ndaron pi drio tant a sto sprefazio e ghe respondaron col deto in talian che un sapiente da Revine al dišéa a la fin de ogni so discorso: “... perché la maldicenza è grande!”.

i crèpa tanaje dal spaghet vanti partir

Ma par tornar a robe pi serie, apunto la corsa de i mus, ghe n’è ‘ncora che i se sovien che te i ani zinquanta, sènpro da San Biaši, na corsa al la vea vinzesta al mus de Pasqual, proprio ’l mus malusol, par che l’arivo l’era davanti la ritonda del pore Toni Scalete (so pare de Piero che ’l se dea tant da far par le sagre) e al mus, che ’l vea oltà do al so conducente, al savéa la strada par tornar casa e cusì, vanti inbocar in tronba al so pòrtego, l’à taja fa na fiseta ’l traguardo. Dopo par an poc la sagra de San Biaši la è sbalada. Ma la è tornada in qua te i ani setanta (che dopo i à anca canbià al regolamento e un, se solche ‘l podéa do ‘n pié par tera, l’era squalificà). E i ghe à mes nome, proprio in onor de i mus (parché i fea anca la cucagna, le pignate e altre ròbe) “Scarpedante”.
Tute le scudarie le mandéa le so bestie, qualcheduna co sganga, qualcheduna altra co suspeto: da Lago la scuderia Pasqual (segur co un mus novo, no quel de i ani zinquanta), quela de Mondo, de l’Orbo Catèl, del Maghét, de Pipeta; da Santa Maria le scudarie Zente e Rico de Cèncio. Egnéa po’ quei da Revine co ‘n gran car co tuti i mus picadi drìoghe (de Mastelin, Simon, Cuc, Checa, Ciano, Rico de i Zòt)

Al car de quei da Revine, co Fiore “capo”

e ’l pore Fiore in testa come capo (anca se a Revine Capo i ghe ciama al so coscrito Pino) de tut sto branco, co da na part Toio de i Carli e da drio Adi. Ghe n’era tanti che i coréa: Gustavo, Silvano, Pasqualino, Guljelmo, Piero, Toio, Livio, Enio, Dario e ’n mucio de quei da Revine. I portéa pò anca mus da Frata e da Nogarol e da Tovena.
Al primo an l’à vinzest an mus da Revine che ’l lo guidèa an tošat che i ghe ciaméa “Merican” parché ‘l vegnéa da la Merica; ma l’è rivà primo par an colpo de fortuna, parché l’era in testa de ’n tòc Fiore; solche che pochi metri vanti ’l traguardo, che l’era ’ndé che dès l’è al postejo de le coriere, un del publico al ghe à fat an senc co la man alta al mus de Fiore, e quel al se à inciodà e, co Fiore che ‘l batéa do fa na bestia, al se à mes de stravès, l’à piantà al mušo su na bancarèla e ’l se à mes a traghe a le caròbole e a le caramèle. Se l’à fat ancora ora a rivar secondo, l’è stat parché al paron de la bancarela al se à mes a scarpedarlo sul dadrìo. Terzo l’era rivà Silvano (“Simon”) sul mus de Mondo.

Fiore co romài ’l credéa de vinzer

Quei de Revine i vea parà su cresta ma al secondo an l’à vinzest Silvano (“Simon”), sènpro col mus de Mondo che, da la contenteza, al ghe à pagà da béver a tuti par na setimana. E, vanti che i partišese, i lo vea vist alzarghe la reja al so mus e dirghe: “O tu vinz sta òlta o fae mortadèla”.
Ma ’l terzo an l’è saltà fora na baraonda: intant a far le proe an conducente che ’l pešéa pocatròp, al ghe à sbrozà fòra ’l mus al Maghét co tute le storie che ghe è ’ndat drio. E pò a la partenza (do davanti Palanca) i mus i pichéa tuti vèrso la scarpada de sote e Angelo da Revine deto Fašól (ma l’é soranome de poc cònt parché i veri fašói i é da Lago) l’à fat un cašòt e l’à olest che i tornese partir da novo: e difati l’é partì mèjo ma dopo vinti mètri al so mus l’à puntà ’l mušo sul cortivo de Gargolin e, coben che lu ’l proese a farlo tornar fòra e i paroni i spendese, al à fat tuta la corsa vanti e indrio par al cortivo (e se l’é ’l modo de dir “San Piero dis al vero...).
E in pì à vinzest an mus da Frata (che la é pì famoša par i pes che par i mus e anca parché la ghe à robà San Martin a quei da Lago) che i à dita che i lo véa pendest par tut l’ultimo retilineo e che ’l dovéa èser squalificà de òlta; secondo l’è rivà al mus de Mondo, che l’era tut do de la soa par la injustizia e che ghe vegnéa squaši da piànder. L’é anca da dir che al mus – da come che l’à dita Silvano – te l’alenamento l’era sbrisà su ’n tacon de sfalto che ’l paséa su e l’era cuèrt de broša e ’l se vea spelà ’n denòcio.
Al mus de Gustavo, quel de la scudaria Orbo Catèl, inveze, par no èser ciapà in mèdo discusion, al sartéa sènpro ’l conducente davanti la so vècia fabrica, la casa de Dante: e i lo tirèa ogni òlta su da la strada destirà come ’n babi (segur Gustavo l’era ’l pi bravo a organišar la corsa de i mus ma nò a corer col mus o fursi no ’l vea catà ’l mus just par lu).

Gustavo, quela unica òlta che no l’è oltà do

Ma an an Gustavo l’é rivà co i primi e l’à sbalà tute le scomese, parché la pi part i vea scometest dopo quanti metri che ‘l saràe oltà do; e l’é stat fursi l’an che l’à vinzest Pasqualino, col mus de so nono Pasqual, che l’é stat na ròba storica: na scuderia che vinz col so mus e ‘l neodo del paron come conducente l’é ’l masimo de l’onor.

Silvano, co i oci de un che dovéa vinzer
(un'altra foto)

In seguito a i incidenti - par che no caiéa sol Gustavo! - i à fat anca na careta del pronto socorso al pore Bepi Forza e ’l pore Piero Lupo co la barèla e ’l cartèl “Asistenza asoluta”). In pì de lònc al percorso era machine drio strada da tute do le part e no i oléa spostarle gnanca a dirghe ’l pericol e qualche mus a podarse al ghe le sbrozéa... contenti lori... ma dopo i vegnéa anca a sacramentar sti ostie. Ma insoma le discusion le deventéa masa, anca se i ultimi ani ghe era ’ndat drio a i mus na machina co un de la giuria sora ’l cuèrt (e entro era anca Berto che ’l fea la cronaca co l’altoparlante...) par vardar se un al podéa i pié par tèra o se i ghe spendéa ’l mus. L’è stat anca storie parché vanti la corsa i ghe dea a i mus na seja piena de na sopa de pan e vin e fin che era i paroni a darghela tut ndea ben ma quanto che era i altri e pò ’l mus no ’l laoréa pi pulito era ’n mucio de storie parché na fameja no la podéa tirar vanti par tut an an co i premi de la corsa. E contéa poc che i ghe dese al mus anca na corona de orèr!

Bepi e Piero co la careta de l’”Asistenza asoluta”

Piero (G.), an concorente da sagre